Tróndur í Gøtu kom inn á Tvøroyri í gjár við 1000 tonsum av svartkjafti.

Skiparin, John Mikkelsen, sigur, at støddin á svartkjaftinum er millum 24-27 cm og vektin er 100-110 gram, sum er brúkilig stødd, tó nakað smátt.

Surimivirkið hjá Varðanum Pelagic er ikki klárt at taka ímóti fiski enn, men virkið far framleitt aðrar vørur til matna. Tað størsta verður skorið til flak, miðalstøddin verður heilfryst og tað smæsta verður somuleiðis heilfryst, men tað fer til minkafóður.

Somuleiðis gera tey á surimideildini ymiskar royndir við fiskinum, so tey eru væl brynjaði til at byrja framleiðsluna, tá hon verður klár.

Tróndur í Gøtu verður væntandi liðugur at landa um fimmtíðina í kvøld, og fara teir tá nýggjan túr.