Nú er tað greitt: Vestergaard útskrivar eginkvotu á 85.000 tons av makreli!
Útvarpið boðar frá at nú fer Vestergaard at útskriva upp til 85.000 tons av makreli.
Eftir landsstýrisfundin í Øravík er greitt, at føroyingar fáa 85.000 tons av makreli. Tað segði Jacob Vestergaard fyri lítlari løtu síðan í samrøðu við heimasíðuna hjá Kringvarpinum.
Spurdur um hann hevur undirtøku í landsstýrinum fyri at skriva út eginkvotuna á 85.000 tons, sigur Jacob Vestergaard, at hann í hvussu er hevur partvís undirtøku.
- Fólk eru sjálvandi ymisk á máli, men eg havi so partvísa undirtøku fyri at útskriva eginkvotuna á 85.000 tons av makreli, sigur landsstýrismaðurin í fiskivinnumálum.
Hann ber ongan ótta fyri, at hini strandalondini, Noreg og ES, fara at taka nøkur stig í sambandi við føroysku avgerðina í makrelmálinum. Landsstýrismaðurin heldur, at tað í mesta lagi kemur ein "peikifingur", men meira verður tað ikki.
Sum higartil ætlað verða tað skipini í Felagnum Nótaskip, sum fáa nógv størsta partin av makrelinum. Men Jacob Vestergaard vil ikki nevna nøkur tøl enn.
- Vit koma at býta út eftir einum ávísum býtislykli, har meginparturin fer til nótaskipini, sigur Jacob Vestergaard.
Landsstýrismaðurin sigur, at loyvini verða útskrivað beinanvegin.
 |
